حكايات علاء الغندور

انت خايف ليه ؟

********************بقلم :علاء الغندور..

مالك ساكت كده ليه؟..انت خايف؟..طبعا انت خايف..انا شايف الخوف فى عينيك..طيب خايف من مين؟ من مراتك

و لاّ من الرئيس؟ أقصد رئيسك فى العمل..و لاّ خايف من العسكرى ؟ و لاّ من الظابط؟ و لاّ خايف من اسرائيل؟

و لاّ خايف من أمريكا؟..قوللى فضفض..قول اللى فى نفسك..انا شايف واحد بيحسس على قفاه الوارم الأحمرالملتهب

قوم أتحرك..اعمل حاجه..غير النظام..اذا كان عندك فيديو 2 نظام..غيرة ب 3 نظام..اذا كانت مراتك هى رجل البيت ..غير النظام و خليك رجل البيت..اذا كنت خايف من رئيسك فى العمل..غيّره يا اما تغير العمل..هتفضل خايف لأمتى؟

خدت ايه من الخوف غير الذل و المهانه..تعال شوف اسرائيل و امريكا بيعملوا فينا ايه؟ عملونا عرايس دميه..وبيرقصونا زى ما همه عايزيين عشان همه عارفين ان احنا بقينا جبناء..قوم ..اتحرك اعمل حاجه أى حاجه..

غير انك تقول بحبك او كرهتك كما قال حليم..امشى فى الشارع و قول: انا مش جبان..انا شجاع..قولها 30مرة فى ..اليوم وشوف النتيجه ايه..و بعدين روح البيت و أشخط فى مراتك و قول لها: انا مش جبان..انا شجاع 30مره

و شوف النتيجه ايه..و أعمل نفس الشيىء مع العسكرى و بعدين مع رئيسك فى العمل..اذا كنت لسه عايش بعد اللى  انت قلته ..يبقى  انت نجحت فى الامتحان و اتعالجت خلاص..بعد كده..يبقى تقدرتعمل حاجات كتير..انت عارفها

واذا كنت مت يبقى الله يرحمك و مت شهيد..و اذا كنت متكسر و نايم فى المستشفى..يبقى يكفيك شرف المحاوله و أحساسك بأنك قلت : لأ ..مرة من نفسك قبل ما تموت جبان.

*******************************************