حسن باشا المهلباتى يتحدث للمتظاهرين الجعانين المفلسين
******--***قصه قصيرة بقلم :علاء الغندور
نزل حسن باشا من سيارته الفارهه الفاخرة ووقف أمام جموع المتظاهرين الذين
كانوا يرفعوا شعار جعانين عايزين ناكل و مفلسين وعايزين نعيش..
ووقف حسن باشا على مكان عالى ليخطب فى المتظاهرين قائلا:
أهلا يا حلوين..ياللى منى زعلانين..الأول نتعرف على بعض..أنا حسن باشا المهلباتى
الشهير بسوسو باشا..وأسم الدلع اللى بينادينى بيه الوظاويظ المألوظين هو
...سون سون
أنا مهلباتى وبحب التهليب..أنا راجل عصامى..و ساقط أعدادية ..بس معايا الدكتوراه
فى علم التهليب..و دى موهبة من عند الله..
أنا مش عارف أنتوا زعلانين منى ليه؟..دنا بأضحى عشانكم..طبعا هتسألونى أزاى؟
أنا هأقول لكم..دلوقتى..أنا لما بأهلب و أسرق فلوسكم وحقوقكم..ايه اللى بيحصل..
أنا أولا بأحميكم من نفسكم عشان كتر الفلوس فى أيدكم فتنة و أنا بأحميكم من نفسكم
عشان أنتوا لما يبقى معاكوا فلوس هتشتروا مخدرات وخمرا ..و هتمشوا مع نسوان
وحشه و كده هتتخرب بيوتكم..شفنوا أزاى أنا بأحميكم من نفسكم و من الشيطان
و فى الآخر هتخشوا الجنه و أنا اللى هأخش النار..يعنى أنا شارى الدنيا و بايع لكم
الآخره.. يبقى أنا غلطان؟.
.أيه يعنى لما تجوعوا شويه؟..حتى بيقولوا فى الأمثال..جوعوا تصحوا
و بعدين هتاكلوا ايه..اللحمه يا أما مضروبه أو عجوزه أو عندها حمى قلاعيه..يا أما
لحمة حمير أو لحمة كلاب..و بعدين أكل اللحمه بيجيب أمراض كتير..طيب و مالها
الطعمية..دى متحمرة فى زيت مستعمل 5000مرة..بس بيجيب الصحه و شغال..
هتقولوا عايزين فراخ..أدى أنتم شايفين أنفلوانزا الطيور شغاله الله ينور.
...هتقولوا عايزين تتعالجوا..يا أخواننا الشافى هو الله..طيب دا حتى معظم الأدوية
يا أما مغشوشه ..يا أما تعالج حته و تبوظ 10حتت تانية..
هتقولوا عايزين تلبسوا..و مالوا..ألبسوا من وكالة البلح..باله ميه ميه..هدوم مستعمله
آخر الآجه..و رخيصه..حاجه ببلاش كده.
هتقولوا عايزيين تتجوزوا..طيب ليه؟ ما تسألوا المتجوزين..يومين عسل و بقية العمر
بصل ونكد و عكننه..خليك زى الطير تقف على كل شجرة شويه و زى البحار له فى كل
مينا موزه حلوه... لأ..ما تفهمونيش غلط..أنا مش عايزكم تنتحروا..أنا بس عايزكم
بس تعرفوا بقة ان أنا خدمتكم أد أيه ..آخر خدمه.
.قولولى بقى يا سون سون.
وهنا سقط جميع المتظاهرين وماتوا بالسكته القلبيه!!!!!
***********--------بقلم : علاء الغندور
25 مايو, 2007 08:44 م