حكايات علاء الغندور

شاهد اللقاء السادس فى الاسكندريه فى17/8/2007

بقلم :علاء الغندور

*************

ااوصلت أمام الفندق متأخرا الساعة 12 ظهرا و كنت متوجس خيفة من لقائى الأول ..و لكن مقابله النعمانى الحميمه لى أزالت أى نوع من هذا

القلق..و أكتشفت أنى ألتقيت يشخصية رائعه تجمع بين الرجوله والأخوه

وخفة الدم الغير عادية وشعرت بأننى و كأننى أعرفه من سنين طويله

..

ثم قامت الأخت العزيزه نبيله غنيم ووقفت ترحب بى بأبتسامها المشرقه ومعها أبنتها الصغنونه علياء و لقد أكتشفت بأن الأخت نبيله أنسانه متميزه فى تعاملها الراقى مع الناس وتشعرك بأنها أختك الصغيرة..

ثم عادل نجم بعناق حار وهو شخصيه ثائرة متمرده وساخره  ثم الاستاذه/ماجده سليمان وزوجها والتى أتحفتنا بعدد من أشعارها الرائعه ثم الأخت الخجوله عبير و الشهيره بدودو والتى

أدهشنى خجلها لأنى أعهد جرأتها فى كتاباتها ووجدتها هادئه وديعه والاستاذ احمد عبد الغفار ثم كريم ومحمد حسن ووحيد وكريم وهيرو ومادز و محمد شوشه الذى أتنبأ له بأن يكون شاعر عظيم..

ثم جاءت الرائعه الاسكندرانيه أيمان حسان وأشكرها بداية على هذا
اللقاء الجميل فى الاسكندرية.. لأكتشف فيها شخصية بنت البلد الجدعه الكريمة..الأنسانه الودوده.. وأشكرها على هذه العزومة الكبيره

ثم الأخت نسمة أحمد وهى شخصية لطيفه وكانت متأثرة و مبتعده عن الكتابه ولكنى طلبت منها العوده حتى لا نحرم من كتاباتها الرائعه.

و الآن أليكم هذا الحوار الضاحك و الذى قمت بتجميعه كما يلى:

علاء الغندور: فيه ايه يا نعمانى؟ بقه تجيبنا من بلادنا عشان تأكل أكلنا و تخلينى انزل اشترى بسكوت ولم اجد هذا الجاتوه المزعوم....و انت تأكل 6قطع جاتوه

فقالت عبير:احنا يا غندور قعدنا نقوله كفاية يا وكيل . كفاية يا عمدة ..حرام، فى ناس جاية ..طيب سيب الساندويتشات..6ساندويتشات يا مفترى!!!
نعمانى :أبدا. آكل الجاتوه و الساندويتشات وبعدى الطوفان.

علاء الغندور: و بعدين يا عبير هوه اكل ساندويتشاتك كمان...يعنى فعلا هوه مفترى زى ما قلتى..
بس ما كانشى العشم..تلسع 6 حتت جاتوه و 6 ساندويتشات كفته من الحجم العائلى ..طيب استنى شويه يمكن حد ييجى من غير فطار
...لن أغفر لك هذا يا نعمانى !!!!!!

معلشى يا عبير اصله لما بيشوف الاكل بينسى نفسه....انما معلشى..يالله بالهنا و الشفا على فلبك يا نعمانى

قال النعمانى:بلاش قر يا غندور
انته عينك صفرا
وبعدين انا هأروح جعان
دي حاجه تجيب انيميا

علاء الغندور:يا نعمانى يعنى بعد الأكل ده كله اللى أكلته
بالهنا و الشفا...وهتروح جعان..؟؟؟!!!
يعنى احنا كده مفروض نعمل حسابنا لما تيجى
نبقى نجهز

لك 30دكر بط و 20خروف و40كيلو سمك و80طيلو كباب 

عشان ما تروحشى جعان..
حاضر من عينينا.

فقالت اختنا ماجده:يا عم رووووووووووووح :
ايه هي المدام عاملة ريجيم زيي ومجوعاك ولا ايه؟
ههههههههههههه
يا عم روووووووووووووووح ..

عادل نجم قال :وبعدين احنا لااكلنا ولا شربنا دى حاجات ايمان جابتها نتصور بيها ورجعت تانى وبعدين النعمانى ياعينى كان مروح بسرعة ولما سالتة قال الحق اكل لى لقمة.
وبعدين احنا اتفقنا على سمك اية اللى خلاها كباب

النعمانى قال :ايوه يا عادل يا اخويا ايمان عامله زي هاله شو
جابت الاكل وركبت صور انا مروح دايخ م الجوع وهي المفتريه بتصورنا واحنا جعانين ثم الاكل مكنش حلو
عاوزين فته مالش دعوه انا حاشتكيكي ف حقوق الانسان

نبيله و بسمه وعلياء يضحكون بشده..

ايمان قالت: والله يا جماعة مش قادرة أرد من كتر الضحك على كلامكم اللى زى السكر هههههههه بجد إنتوا تجننوا كلكم

النعمانى فال : متاخديناش في دوكه
فين الاكل
والا حتجوعينا تاني!!!

علاء الغندور: شربات يا نعمانى و الله..
يا ايمان الحقيه بجوز ارانب تصبيره لغاية
ما تجهزى العشا....

النعمانى قال : ياراجل بلاش بخل
جوز ارانب بس
قول جوز حواله
جوز فيله
جوز هند
هند مين دي؟

ايمان قالت:هههههه يا نعمانى سيبنى أرد على الناس الله يخليك والله إنت مش ممكن ههههههه
الناس خلاص عرفت ديتك الأستاذ علاء بيقول جوز أرانب مش عارف إنى لو جبتلك جوز هند هتاكله صاحي ههههههه..

الاخت ماجده قالت: مش هقول أكثر من ان كرمك الأفلاطوني أخجلنا ..
وإذا كانوا الشراقوة عزموا القطر ..
ايمان حسان عزمت المدونين ..
تسلم يا جميل على الكلام والأكل والجاتوه والكابتشينوا ..
قلت: عارف يا نعمانى
لو ايمان طبخت لك ديناصور..برضه هتقول لها دول عصافير...!!!!
انت حاطط فى بطنك ديناصورات مقاس كام؟

عبير قالت:الغالية جدا ايمى
مش عارفة اقول ايه لأشكرك على كرمك الحاتمى. بجد بجد انا ممتنة ليكى جدا

نبيله : شكرا ليكى يا ايمى على كرمك الطائى..

نعمانى:والله انا ليه الشرف اني عرفتك يا غندور بس متقعدش جنبي المره الجايه لاكل دراعك!!!!

غندور: و لا يهمك يا نعمانى..هأجلس حنبك و
كل دراعى و اتبسط..بس هيه ضاقت فى وشك لما تاكل دراع خشن!!!!!!

ايمان : منك لله يا نعمانى عاوز تاكل دراع الراجل كمان هههههههه أهو بيقولك دراع خشن دورلك على دراع طرى الحمد لله أنا دراعى خشن بردو هههههههه ..ربنا يستر وما تكلش حد من الشباب ، المفروض العزومة الجاية تبقى فى المحمودية بيتش على رأى كريم ههههههه !!!

علاء الغندور: انا مش عارف ايه نوع الديناصورات اللى ساكنه جوة بطنه و جتله ازاى؟
احنا نخللى الاجتماع فى حديقة الحيوانات بجوار قفص الاسود و ندّخله للأسود يأكلهم..
بس المشكله انه بعد ما يأكلهم هيطلع يقول جعان!!!

نبيله تضحك بشده

************